Экспедиция хайысхата Тиит Арыы-Покровскай-Мэлдьэхси-Алтан.
1906 сыллаахха толору эрэйээлинэй училищены бүтэрэн, Норуоту үөрэхтээһин министиэристибэтин 1907 сыл бэс ыйын 9 күнүнээҕи 660 № — дээх бирикээһинэн Мэлдьэхсигэ Күөх оттоох диэн сиргэ саҥа арыллыбыт оскуолаҕа үлэлии кэлэн нэһилиэккэ үөрэҕириини төрүттээбитэ. Онно биир сыл үлэлээн баран Томскай куоракка үөрэҕин салҕыы барар.


Экспедиция үлэтин Мэлдьэхси оскуолаттан саҕалаата. Оскуола директора Л.Д. Сыромятникова көрсөн оскуола үлэтин туһунан кэпсээтэ. Билигин академик А.В. Чугунов аатын сүгэр, агро-хайысхалаах оскуола буолар. Надежда Карловна Андросова Мэлдьэхси кыраайы үөрэтэр музейын уонна академик А.В. Чугунов туһунан залы экскурсия ыытта. Г.В. Ксенофонтов үлэлии сылдьыбыт кэмнэрин Мэлдьэхси дьоно-сэргэтэ умнубаттар, кини туһунан көрдөрөр стенданы уонна үлэлии сылдьыбыт оскуолатын макетын А.Плотниковка онотторон үйэтиппиттэр. Н.К. Андросова Г.В. Ксенофонтовка үөрэнэ сылдьыбыт дьоннор тустарынан матырыйаал хомуйбутун биэрдэ. Экспедиция кыттыылаахтара Мартынова Е.А. Хаҥалас улууһун кыраайы үөрэтэр музей директора, Степанова Р.С. Ксенофонтавтар дьиэ кэргэттэрин музейын салайааччыта, Тимофеева Н.Г., Скрябина Е.В., Свинобоев В.А. музей специалистара Г.В. Ксенофонтов үлэтин, олоҕун, дьиэ кэргэнин туһунан оскуола үөрэнээччилэригэр уонна учууталларга презентация уонна киинэ көрдөрдүлэр. Оскуола уонна нэһилиэк библиотекатыгар Г.В. Ксенофонтов, улуус туһунан кинигэ бэлэхтээтилэр.
Экспедиция Мэҥэ-Хаҥалас Алтан нэһилиэгэр салгыы айанаата.


1920 сыллаахха кулун тутар ый 13 күнүгэр Г.В. Ксенофонтов Роман Верховцев оннугар Куталаах диэн сиргэ Алтаннааҕы биир кылаастаах училищеҕа учууталынан ананан кэлбит.(Ф. Р-25,оп.1 д.125). Бу оскуолаҕа 4 ый үлэлээбит.
Экспедиция кыттыылаахтарын Алтан орто уопсай үөрэхтээһин оскуолатын директора Винокурова Аграфена Васильевна уонна Алтан нэһилиэгин баһылыга Николай Егорович Матчитов көрүстэ. Оскуола үөрэнээччилэрин, учууталларын, краеведтарын кытта иһирэх көрсүһүү, кэпсэтии буолла. Алтан нэһилиэгин кыраайы үөрэтээччитэ Попова Любовь Егоровна нэһилиэк историятын кэпсээбитинэн 20-с үйэ саҕаланыытыгар Алтан нэһилиэгэр Бүтэйдээх, Үөһээ Алтан, Сатаҕай киирэллэр. Куталаах диэн ааттаах сир Бүтэйдээххэ уонна Өлөчөйгө эмиэ баар эбит. Онон Гавриил Васильевич учууталлаабыт сирэ быһаарыллыбата. Экспедиция Г.В. Ксенофонтов учууталлыы сылдьыбыт сирин чопчулуурга салгыы үлэлиир.
Экспедиция кыттыылаахтарыттан Мэҥэ-Хаҥалас улууһун Мэлдьэхси уонна Алтан нэһилиэктэригэр, суоппарбытыгар Вадим Олесовка махталбытын тиэрдэбит.