Хаартыскаҕа 1977 с. тахсыбыт кинигэ ис хоһооно.

1926 сыллаахха учуонай хомуйбут матырыйаалын илдьэ Ленинградка барбыта. Биллиилээх сэбиэскэй учуонай И.И. Майнов кини хомуйбут сүдү үлэтин көрөн баран Бүлүү сахаларын үһүйээннэрэ аан бастаан маннык киэҥник хомуллубуттарын бэлиэтээбитэ, Дьокуускай уокуругун сахалара хайыы-үйэ умнубут түгэннэрин бүлүү сахалара илдьэ сылдьаллар эбит диэн сыаналаабыта.

Рукопись улахан болҕомтону тардыбыта эрээри, учуонай бииргэ төрөөбүт быраата Павел Ксенофонтов бэлиитикэҕэ дьайыыларыттан сылтаан, уонна Гавриил Васильевич кинигэтигэр оҥорбут түмүктэрин кытта сөбүлэһии суох буолан, үлэтэ тыыннааҕар бэчээттэммэтэҕэ.

Учуонай доҕотторугар суругар «сахалар мин үлэбин өлбүтүм кэннэ биирдэ таһаарар буоллулар быһыылаах, өлбүтү тыыннаахтааҕар ордук аахсаллар» диэбитин «Автономная Якутия» хаһыат өссө 1930 сыллаахха бэчээттээбит эбит.

Рукопись өр кэмҥэ сүппүтүнэн ааҕылла сылдьыбыта. Хата, ону 1975 сыллаахха П.Е. Ефремов диэн саха учуонайа Москубаҕа ГАИЗ архыыбыттан булан ылбыта.