Саха дьахтарын кыһалҕалаах олоҕун, ыар дьылҕатын туһунан 1904 с. Өксөкүлээх Өлөксөй «Саха дьахталларын мэтириэтэ» диэн айымньытыгар суруйбута. Поэт дьахталлар олохторун уонна мэтириэттэрин харса суох кырдьыктаахтык ойуулууругар амарах, эйэҕэс дьахтар аас-туор олохтон майгыта-сигилитэ алдьанарын өтө көрдөрбүтэ. Поэт тылынан хоһуйар эбит буоллаҕына, кыраайы үөрэтээччи, иллюстратор, дьүһүннүүр, этнограф худуоһунньук Иннокентий Пестряков (19.07.1962 – 06.05.2004) бу айымньыга олоҕуран уруһуйдаабыт мэтириэттэрэ ол саҕанааҕы кэм дьахталларын утары көрөн түһэрбит курдук табыллыбыттар. Бу иллюстрациялар холобур буолар уһулуччулаах айымньыларга киирсэллэр.