Егоров Альберт Альбертович

14.03.1989 – 05.05.2025 гг.

Позывной «Квадрат»

      Раиса, Альберт Егоровтар дьиэ кэргэнигэр төрдүс оҕонон күн сирин көрбүтэ. Хаҥалас улууһун Булгунньахтаах орто оскуолатыгар 1996 сыллаахха бастакы кылааска үөрэнэ киирбитэ. Үөрэҕэр кыһамньылаах, кинигэни, хаһыаты сөбүлээн ааҕара. Спордунан дьарыктанар, тустар, футболлуур этэ. Тустуунан дьарыктанан үгүс ситиһиилэммитэ, хаста да оскуола призера буолбута. Оҕо эрдэҕиттэн дьонугар Булгунньахтаах сопхуоһугар сүөһү көрүүтүгэр көмөлөһөрө.

      Оскуоланы 2005 сыллаахха бүтэрбитэ. Альберт бэйэтэ ис иһиттэн дьоҥҥо көмөлөһөр этэ, эдьиийдэригэр, аймахтарыгар сайын оттоһоро. Тутууга үлэлээбитэ. Эллэкэй, сымнаҕас майгылаах этэ.Төрөппүттэрин убаастыыр этэ.

      Альберт анал байыаннай дьайыыга контракт түһэрсэн 2024 сыллахха бэс ыйын 30 күнүгэр барбыта. Запорожье уобалаһыгар пулеметчигынан сэриилэспит. 2025 сыллаахха ыам ыйын 5 күнүгэр Запорожскай уобалас Пологовскай оройуон Червоное сэл. табаарыһын быһыы сылдьан күн сириттэн туораабыта.