Михайлов Иннокентий Иванович
10.12.1983 – 01.06.2022 гг.
Иннокентий Иванович ахсынньы ый 10 күнүгэр 1983 с. элбэх оҕолоох Кетруда Николаевна уонна Иван Иннокентьевич Михайловтар дьиэ кэргэҥҥэ төрдүс оҕоннон төрөөбүтэ.
Иннокентий оҕо сааһа төрөөбүт Нөмугутун сиригэр, сайын аайы төрөппүтэрин кытта Хараанай сайылыгар ааспыта. 1990 сыл балаҕан ыйын 1 күнүгэр Ой орто оскуолатын боруогун атыллаан бастакы кылааска үөрэнэ киирбитэ. 2001 сыллаахха оскуолатын ситиһиилээхтик үөрэнэн бутэрбитэ. Ол сыл ахсынньы ыйыгар ытык иэһин толоро Российскай Армия кэккэтигэр ыҥырыллан барбыта, военно-морской флотка сулууспалаабыта. Армияҕа сулууспалыы сылдьан 2003 сыл кулун тутар 13 күнүттэн муус устар 24 күнүгэр диэри Чечня Республикатын территориятыгар ыытыллыбыт боевой действияларга кыттыыны ылбыта. Ытык иэһин толорон 2003 сыл ахсынньы ыйыгар эргиллэн кэлбитэ.
2004 с. тыа хаһаайыстыбатын техникумугар үөрэххэ киирэр, 2007 с. юрист правовед идэтин ылбыта. Үөрэҕин бүтэрээт Хаҥалас улууһун милиция отделыгар улэҕэ киирэр. Үлэтигэр бэриниилээх, толоругас буолан, Покровскай куоракка участковайынан ананан үлэлээбитэ. Ону туоһулуур хас да Почетнай грамоталара.
2006 сыл муус устар ый 21 күнүгэр сүрэҕин аҥаарын көрсөн Алла Борисовналыын уруу тэрийэн, ыал буолар. Үс кэрэчээн Милана, Камила, Даминика диэн кыргыттары күн сирин көрдөрөн, ньир бааччы олорбуттара.
Милицияҕа үлэлии сылдьан 2014 сыллаахха баҕа өттүнэн Российскай Армия кэккэтигэр 2 сыл контракт баттаан сулууспалыы барбыта. Петропавловск – Камчатскайга 10103 байыаннай чаас зенитно ракетно-артиллерийскай дивизион, зенитнай ракетнай батарея, отделения хамандыырынан сулууспалаабыта. Сулууспалыыр кэмнэригэр бэйэтин толоругас, эппиэтинэстээх, грамотнай, туруоруллубут сыалы ситиһэр, отделения командирынан билинэр этибит диэн войской чааһын командира полковник Клименков суруйбут характеристикатыттан биллибит. 2014 с. ахсынньы ый 31 күнүгэр РФ Оборонатын миниистирин прикаһынан «За участие в военном параде в ознаменование 70-летия Победы в Великой Отечественной Войне» диэн мэдээлинэн наҕараадаламмыта. 2016 сыллаахха контрага бүтэн, дойдутугар кэлэн Чааһынай охраннай тэрилтэҕэ улэҕэ киирбитэ.
2019 сылтан Нөмүгү нэһилиэгин олохтоох дьаһалтатыгар землеустроителинэн ананан үлэлии сылдьан 2022 сыллаахха муус устар ыйыгар бэйэтин баҕа өттүнэн уурайан, Ийэ дойдутун көмүскүү, контрагынан анал байыаннай эпэрээссийэҕэ сулууспалыы ыам ыйын 2 күнүгэр көппүтэ.
01.06.2022 с. сырдык тыына геройдуу сэрии толоонугар быһынна. Ийэ дойдутун көмүскүү сылдьан, анал байыаннай дьайыыга хорсуннук охтубут Михайлов Иннокентий Иванович РФ Президенэ В.В.Путин илии баттааһыннаах государственнай наҕарааданы «Орден Мужества» өлбүтүн кэннэ иҥэриллибит.