Прокопьев Виктор Александрович
07.05.1985 – 29.09.2024 гг.
позывной «Вилюй»
Место рождения: с. Верхневилюйск, Верхневилюйский р-н, Якутская АССР.
Место гибели: г. Угледар, Донецкая народная республика.
Профессия: строитель-прораб, столяр, электросварщик МАУ «Городская среда» ГП «Город Покровск».
Воинское звание и должность: гвардии рядовой, мотострелок-оператор СБР (станция ближней разведки) штурмовой группы отдельной мотострелковой бригады в/ч 69647.
Прокопьев Виктор Александрович 1985 сыл ыам ыйын 7 күнүгэр Үөһээ Бүлүү сэлиэнньэтигэр элбэх оҕолоох Прокопьевтар дьиэ кэргэннэригэр төрөөбүтэ. Ийэтэ, Розалия Дмитриевна, «Холбос» атыы-эргиэн тэрилтэтигэр өр сылларга товароведынан үлэлээбитэ. Аҕата, Александр Николаевич, леспромхозка биир бастыҥ механизатор этэ. Эйэлээх, үлэни өрө туппут ыал этэ. Витя балтараа сааһыттан бастаан дьааһылаҕа, онтон детсадка оскуолаҕа киириэр-дылы сылдьыбыта. —
Витя 1991 сыллаахха Үөһээ Бүлүүтээҕи М.Т. Егоров аатынан иккис нүөмэрдээх орто оскуолаҕа маҥнайгы кылааска үөрэнэ киирбитэ. Үөрэҕи түргэнник ылынар буолан алын кылаастарга наар үчүгэй сыаналары ылан төрөппүттэрин үөрдэрэ. Элбэх доҕоттордооҕо, бэйэтин кыанар буолан спордунан дьарыгырара. Оҕо спортивнай оскуолатыгар көҥүл тустуунан дьарыгырбыта, араас курэхтэһиилэргэ, тэрээһиннэргэ кыттара. «Улуу Уолан» диэн күрэххэ бастаабыта. Табаарыстара киниэхэ ытыктабыллаахтык сыһыаннаһаллара. Витя орто оскуоланы 2003 сыллаахха ситиһиилээхтик бүтэрбитэ.
2003 сыл куһүнүгэр Үөһээ Бүлүүтээҕи 26 нүөмэрдээх орто анал үөрэх кыһатыгар суоппардар куурустарыгар үөрэнэ киирбитэ. 2004 сыл ыам ыйыгар Советскай армия кэккэтигэр сулууспаҕа ынырыллыбыта.
Приморский кыраай Уссурийскай куоратыгар ИДьМ спецназ анал чааһыгар снайперынан 2 сыл ситиһиилээхтик сулууспалаабыта. Сулууспатын иһин байыаннай чааһын командованиетыттан хайҕабыл суругунан, грамотанан наҕараадаламмыта.
2006 сыллаахха этэҥҥэ сулууспалаан төрөөбүт дойдутугар эргиллэн кэлбитэ. Кини оҕо эрдэҕиттэн айылҕаттан бэриллибит дьоҕурунан маһынан уһанарын сөбүлүүр буолан Дьокуускай куоракка дьиэ тутуутунан дьарыгырар. Өр кэмҥэ прорабынан, биригэдьииринэн үлэлиир. Ол сылларга тимиринэн уһана үөрэнэр.
Кэнники сылларга Покровскай куоракка «Городская среда» диэн муниципальнай тэрилтэҕэ контрагынан байыаннай анал дьайыыга барыар диэри үлэлиир. Бу тэрилтэ куораты киэргэтиигэ, ыраастык тутууга, дьон сылдьарыгар табыгастаах буоларыгар үлэлиирэ. Виктор Хаҥалас улууһун администрациятын дьиэтин иннигэр турар улахан сэргэни оҥорбута. Притузов аатынан уулуссаҕа оҕо оонньуур площадкатын тимир улэтин толорбута. Ону таһынан бииргэ үлэлиир табаарыстарын кытта куорат өрүс үрдүнээҕи кытылын уонна саҥа бульвары тупсарыыга үлэлээбитэ.
2012 сыллаахха Виктор гражданскайынан ыал буолан Розалина диэн кыыс оҕолоноллор. Оҕомсох буолан кыратыттан үксүн бэйэтэ көрбүтэ. Билигин Розалина, Дьокуускай куорат 13 нүөмэрдээх орто оскуолатыгар 5 кылааска үөрэнэр. Розалина айылҕаттан дьоҕурдаах буолан үҥкүүнэн дьарыгырар уонна бэйэтэ хомус тардарга үөрэнэр, куонкурустарга кыттан миэстэлэһэр.
Витя ийэтинэн эһэтэ Харабаев Дмитрий Иванович «Холбос» систиэмэтигэр өр кэмҥэ үлэлээн «Отличник торговли России» буолбута. Эбэтэ Харабаева Тамара Дмитриевна оҕо уһуйааныгар иитээччинэн үлэлээбитэ. Ийэтин өттүнэн хос эһэтэ Харабаев Иван Егорович (Муос Хараабай) гражданскай сэрии Геройа (Кыйыл Сулус орденынан наҕараадаламмыта).
Иккис хос эһэтэ Васильев Кирилл Петрович Аҕа дойду Улуу сэрии толоонугар Ржев куорат, анныгар 1943 с. ыараханнык бааһыран өлбүтэ. Эһэлэрин холобурдарынан хорсун Ийэ дойдуга бэриниилээх патриот буолан улааппыта.
Виктор 2024 сыл атырдьах ыйыгар контракт туйэрсэн аналлаах байыаннай дьайыылар буола турар сирдэригэр бэйэтин баҕа өттүнэн барар. Барыан иннинэ дьонугар «Мин Ийэ дойдубун көмүскүү барабын. Хайаан да ытык иэспин төлүөхтээхпин. Ийэ дойдуну көмүскээн дьиэ кэргэммин, бырааттарбын, балтыларбын көмүскүүбүн» диэбитэ.
Виктор балаҕан ыйын 29 күнүгэр табаарыстарын көмүскээн Донецкай уобалас Угледар куоратын анныгар геройдуу охтубута.
Биһиги оҕобутунан, убайбытынан, таайбытынан, бырааппытынан, аҕабынан кини хорсун быһыытынан киэн туттабыт, кини сырдык аатын хайан да умнуохпут суоҕа! Кини сырдык мөссүөнэ сүрэхпитигэр өрүү тыыннаах!
Ахтыылар.
Убайбын Витяны кытары оҕо сылдьан куруук бииргэ сылдьар буолааччыбыт, бииргэ бултаан-балыктаан, оонньоон-күөнэхтээн. Аҕабытын кытары сайын аайы оттуурбут. Оттуу сылдьан сыал ытыалаан күрэхтэһээччибит. Онно дьэ табара бэрт буолааччы, кыҥаабыт сиригэр чопчу туһэрэрэ. Оҕо сааспытын бииргэ бодоруһан улаатан ааспыппыт. Убайбын Витяны кытары куруук куоталаһан күрэхтэһэн тахсааччыбыт. Дьэ онно кыайыылаах-хотуулаах кини тахсан иһээччи. Дьон биһигини игирэ оҕолор диэн көрөөччүлэр. Убайым талаана наһаа да элбэх этэ, маһынан ону-маны тутааччы-уһанааччы. Спорт өттүгэр эмиэ сүрдээх кыайыылаах-хотуулаах тахсааччы, куруук мэтээлгэ-муһэҕэ тубэһэрэ. Бултуу бардаҕына булгуччу өттүк харалаах кэлээччи. Дьэ уонна доҕор-атас диэҥҥэ сүрдээхтик охтубут оҕо этэ. Кэлин улаатан баран куруук этэр тыллаах буолааччы: — Мин аҕам курдук Бэргэммин, — диэн. Туохтан эмит толлор-куттанар диэни билбэт этэ. Мин куруук убайбынан киэҥ туттабын!
Прокопьев Т. А.
Бииргэ төрөөбүт быраата.
Хас биирдии учууталга бастакы кылааһын оҕолоро ордук күндү буолаллар. Бастакы хараҥаччыларын ситиһиилэрэ, олоххо суолларын булуулара – барыта олус үөрдэр. 2003 сыллаахха бастакы выпуһум оҕолоро билигин бары дьоһун дьон, ыал ийэлэрэ, аҕалара. Сэмээр барыларын кэтиигин, этэҥҥэ буолалларыгар баҕараҕын. Бу баарга дылы эта кырачаан оҕолор үөрэ-көтө оонньууллара, боччумуран олорон үөрэнэ олороллоро, мэниктээн сүүрэллэрэ-көтөллөрө… Бары да көхтөөх, араас тэрээһинтэн туора турбакка кыһаллан кытталлара, күрэхтэри көтүппэккэ ситиһиилээхтик кытталлара. Биир саамай уратылара олус иллээх этилэр, ол да курдук билигин да биир сомоҕо буолан үөрүүгэ, хомолтоҕо тутуспутунан бэйэ-бэйэлэрин өйөһө сылдьалларыттан киһи үөрэр.
Витя биһиэхэ орто сүһүөх кылааска кэлбитэ. Сүрдээх симик, ып-ыраастык көрбүт уолчаан. Наһаа сэмэй буолан мүчүк гына олорорун өйдүүбүн. Сытыы-хотуу, киирбит-тахсыбыт буолбатах, олус сымнаҕас буолааччы. Ол эрэн кылааска начаас киирбитэ, доҕордоһо охсубута. Оҕолор Витяны сөбүлээн Витёк диэн ааттааччылар. Ийэтэ олус кыһаллар төрөппүт буолан биир да мунньаҕы көтүппэт буолара. Онон дьиэ кэргэнигэр иитиитэ олус учугэй буолан Витя майгыта сымнаҕас, үтүө санаалаах буолааччы. Үлэ уруогар: «Саҥа кэлбит уолуҥ тыыппалаах эбит, илиитигэр үчүгэй буолсу», — диэн учуутала эппитин өйдүүбүн. Спорт күрэхтэригэр кыттара, бэйэтин олус кыанар этэ. Уолаттары кытта араас үлэ буоллун барытыгар кыттааччы, куоталаһыыга ситиһиилэнээччилэр.
Аан дойдуну аймаабыт байыаннай быһыыга хорсун санаалаах эдэр ыччаттарбыт дойду туһугар туруулаһан сулууспалыы барыылара бу патриотическай иитиилэрэ куустээҕин туоһулуур. Витя хорсун санаалаах буолан сэриигэ барыыта кини күүстээх эр хоһуунун көрдөрөр. Витябыт хомолтолоох сураҕын бары олус айманан истибиппит. Кини ситэ олорботох олоҕун кыыһа олоруо, сырдык аатын ааттатыа. Витекпут сырдык мөссүөнэ биһиги сүрэхпитигэр хаалыа.
Гольдерова Л.В.,
кылаас салайааччыта.
Бииргэ үөрэммит доҕорбут Витёк киһи быһыытынан элэккэй, сэмэй, күлэн мүчүк гына сылдьар, үтүө санаалаах, киэҥ көҕүстээх уол этэ. Аҕыйах саҥалаах да буоллар дьээбэлээн күллэртиирэ. Бэйэтин эт-сиин өттүнэн лаппа кыанар буолан спорт бары да көрүҥэр кыттан кылаас, оскуола чиэһин көмүскүүрэ. Сатабыллаах буолан үлэттэн туора турбата, көмөлөһө сылдьара. Илиитигэр талааннаах буолара, кэлин быһах кытары оҥорор буолбут этэ.
Оскуола кэнниттэн аармыйаҕа үчүгэй чааска тубэһэн 2 сыл сулуспалаан ытык иэһин толорон кэлбитэ. Анал байыаннай дьайыы саҕаламмытыгар бастакынан бэйэтэ баҕа өттүнэн барарга быһаарыныы ылыммыт этэ. Патриотическай санаатынан хайаан да дойдубутун көмүскүү барабын диэн барбыта. Ханна тиийбитин, туох буола турарын сырдата турара. Этэҥҥэ эргиллэн кэлиэ диэн эрэнэрбит уолбутун.
Витёк сырдык мөссүөнүн, күлэн мүчүк гына сылдьарын, хорсун табаарыспытын умнуохпут суоҕа.
Сырдык сулус буолан чугас дьонун, доҕотторун суолларын сырдата сырыт!
Бииргэ үөрэммит доҕотторо.
Витёктуун ахсыс кылаастан бииргэ үөрэммиппит. Дьиҥҥээх эр бэрдэ буолара. Туохтан да толлон турбат, көрдөстөххө аккаастаммакка куруук көмөлөһөрө. Илиитигэр талааннаах буолара, маһынан-тимиринэн учугэйдик уһанара. Тэҥҥэ холтуураларга сылдьарбыт. Оскуола да кэнниттэн сибээспитин быспакка өрүү билсэрбит.
Анал байыаннай дьайыы саҕаланыаҕыттан дойдубун көмүскүүбүн диэн тирэх санаалааҕа, онтун тутуһан контракт баттаһан барбыта. Тиһэх кэмнэригэр дылы сибээһин быспакка сылдьыбыта. Комсомольск-на-Амуре учебка ааһа сылдьабын, дойдум уолаттарын көрүстүм диэбитэ. Эрийэригэр наар күлэ-үөрэ кэпсэтэрэ. Доҕорум эргиллэн кэлиэ диэн күүтэрим, суорума суолламмытын истэн олуһун хомойбутум.
Табаарыһым Витёк, быдан дьылларга быраһаай, өйдүү-саныы сылдьыам.
Дьулустаан Васильев
(Бииргэ үөрэммит, алтыспыт доҕоро)
Прокопьев Виктор Александровичтыын 2021 сыл сааһыгар биһиги тэрилтэбитигэр үлэлии кэлбитигэр билсибиппит. Бииктэр сатыыра элбэх этэ, олох үчүгэйдик сваркалыыра. Наар үөрэ-күлэ сылдьара, учугэй настроениялаах үлэлиирэ. Үлэтиттэн олох сылайбат этэ.
2022 сыллаахха улуус администрациятын дьиэтин иннигэр сэргэ туруорбуппут. Онно Бииктэр барытын сваркалаан ылсыбыта. Куорат баанньыгын өрөмүөнүгэр маска сыһыаннааҕын көрдөрбүтэ. Улахан техника да ремонугар сыстан үлэлэспитэ.
Оннук үлэлээн тэрилтэ тутаах үлэһитэ буолбута. Дьоҥҥо куһаҕаны хаһан да баҕарбат үтүө санаалаах этэ. Дьоҥҥо көмөлөһөртөн хайан да аккаастаабатаҕа, Онтон анал байыаннай дьайыылар саҕаламмыттарыгар патриот буолан онно барабын диэн табаарыспыт, доҕорбут барбыта. Олох барабын диэн биир тыллааҕа.
Андреев С.С.
«Городская среда» МАУ салайааччыта
