Кельциев Николай Егорович
08.06.1992 – 13.02.2024 гг.
позывной «Келя»
Рядовой, анал байыаннай операция кыттыылаа5а, «Хорсунун иһин» мэтээлинэн наҕараадаламмыт Кельциев Николай Егорович 1992 сыллаахха бэс ыйын 8 күнүгэр Нөмүгү нэһилиэгэр күн сирин көрбүтэ. Эһээтин аатынан Коля диэн сүрэхтээбиттэрэ.
Коля оҕо сааһа төрөөбүт Нөмүгүтүн сиригэр-уотугар ааспыта. 1999 сыллаахха Коля Ой орто оскуолатын боруогун атыллаан бастакы кылааска киирбитэ. Оскуолаҕа үөрэнэр сылларыгар истиҥ, эйэҕэс доҕор, туохтан да толлон турбат, элэккэй майгылаах үөрэнэччи буолара. 2008 сыллаахха тохсус кылааһы бүтэрэн, баҕа санаатын толорон Жатайдааҕы 5 нүөмэрдээх профессиональнай лицейга повар үөрэҕэр үөрэнэ киирбитэ. Лицейы 2011 сыллаахха 4 разрядтаах повар, 3 разрядтаах кондитер идэлээх ситиһиилээхтик үөрэнэн бүтэрбитэ уонна тутатына Российскай Армия кэккэтигэр ыҥырыллан сулуспалыы барбыта. Кини 2011-2012 сс Хабаровскай куоракка ракетно-техническай войскаҕа чиэстээхтик сулуспалаан, ытык иэһин толорон дойдутугар кэлбитэ.
2012 сылтан таптыыр идэтинэн, поварынан үлэтин саҕалаабыта уонна анал байыаннай операцияҕа барыар дылы үлэлээбитэ.
2017 сыллаахха олоҕун аргыһын, тапталлаах доҕорун Юляны көрсөр, 2018 сыллаахха уол оҕоломмутара – Артур диэн сүрэхтээбиттэрэ, 2019 сылга Юлятынаан сокуонунан ыал буолбуттарын бигэргэппитэрэ. Дьокуускай куоракка олохсуйан олорор санаалаах дьиэ ылынан ньир-бааччы олорбуттара.
2022 сыл алтынньы ыйга анал байыаннай операцияҕа мобилизациянан ыҥырыллан сулууспалыы барбыта. 25573 байыаннай чааска: наводчик гранатометного отделения взвода огневой поддержки штурмовой роты мотострелкового батальона тубэспитэ.
Коля 2023 сыл атырдьах ыйыгар кылгас уоппуска5а кэлэн дойдутугар чугас, тапталлаах дьонун ортотугар сылдьан, сынньанан барбыта.
2024 сыл олунньу ый 13 күнүгэр геройдуу анал байыаннай операция буола турар Украина дойдутугар сэрии толоонугар сырдык тыына быстан олохтон эдэркээн сааһыгар туораабыта.
Кини оҥорбут хорсун быһыыта сыаналанан, государственнай наҕарааданы «Орден Мужества» өлбүтүн кэннэ иҥэриллибитэ.
“Коля оҕо эрдэҕиттэн бултуурун, балыктыырын, уһанарын сөбүлүүрэ. Эйэҕэс майгылаах, туруоруммут сыалын ситиһэр, куруутун күлэ-үөрэ сылдьар оҕонон ойдүүбүт. Эдэри кытта эдэрдии, саастаах дьону кытта дьоһуннук кэпсэтэн, кими да туора көрбөккө көмөтүн ууна сылдьара…”
