Бүгүн Г. В. Ксенофонтов аатынан Хаҥалас улууһун кыраайы үөрэтэр түмэлигэр Саха республикатын норуотун маастара, М. К. Аммосов аатынан Хотугулуу-Илиҥҥи Федеральнай университет иһинэн тэриллибит Светлана Ивановна Петрова-Уран Хатын салайар «Уран иис» үрдүкү кыһатын маастара, кырадаһынтан тигиигэ маастар, 1985 сыллаах Аан дойдутааҕы ыччаттар уонна студеннар фестивалларын лауреата – национальнай тигиигэ, Хатастааҕы «Хатастыына» кулууп салайааччыта Козлова Дария Семеновна, 2015 сылтан саҕалаан уһуйар-салайар «Кырадаһын абылаҥа» түмсүүтүн айар үлэтин быыстапкатын арыллыыта буолла.
Бу быыстапка улууска таҥас кырадаһыныттан тигиини киэҥник пропагандалыыр сыалтан тэрилиннэ.
Таҥас кырадаһаныттан иис сахаларга былыр-былыргыттан баар. Ол курдук биһиги эбээлэрбит тикпит саахымат ойуулаах көбүөрдэрэ, орон сабыылара күн бүгүнүгэр диэри бааллар. Онтон чаппарааҕы тигиигэ 18-с үйэ бутэһигэр кырадаһыннары туттар буолбуттара. Билигин таҥастан эрэ буолбакка, түүттэн эмиэ аттарыллыбыт тигии элбээтэ. Кэнники 10-ча сылтан бэттэх таҥас кырадаһыннарыттан тигии республикаҕа күүскэ сайынна. Ол курдук саамай бастаан норуот маастара Зверева Анна Николаевна саҕалаабыта. Ыытыллар быыстапкалар национальнай таҥас кырадаһыннарыттан иис сайдыытыгар улахан олугу уурбуттара.
Бу түмсүүгэ биир дойдулаахпыт, Үөдэйтэн төрүттээх Ноговицына (Кирова) Ирина Алексеевна махтал тылларын этэн туран түмэлгэ чороон бэлэх уунна.
Хаҥалас улууһун культуураҕа уонна духуобунай сайдыыга управлениятын аатыттан редактор Галина Дмитриевна Семенова, Арчы дьиэтин методиһа, Хаҥалас улууһун айар-тутар идэлээх “Уран” түмсүү салайааччыта Надежда Валерьевна Степанова «Кырадаһын абылаҥа» түмсүү быстаапката арыллыбытынан эҕэрдэлээн махтал сурук туттардылар.
«Кырадаһын абылаҥа» түмсүү кыттыылаахтара ырыа кэһиилээх ыалдьыттары көрсөн үөртүлэр.
Быыстапка муус устар 19 күнүгэр диэри үлэлиэҕэ. Кэлин, көрүҥ-сэргээҥ!

Метки: