Ити курдук айар-суруйар дьарыкка дууһалыын ылларбытын бэйэтэ да билбэккэ хаалбыта. Кини суруйбут хоһоонноро, кылгас бэлиэтээһиннэрэ оройуон хаһыатыгар, «Бэлэм буолга», «Эдэр коммуниска», кэлин «Хотугу сулус», «Полярная звезда», о.д.а. сурунаалларга бэчээттэнэр буолан барбыта. Павел Харитоно хоһоонноругар мелодистар ырыа суруйан киэҥ маассаҕа таһаараллара. Ол курдук кини «Эйэ-дьол ырыата», «Тапталлаах куоратым» диэн ырыалара истээччигэ сөбүлэтэн, дьон-норуот таптыыр ырыата буоллулар.
Павел Николаевич ханнык да жанрга ылсыспытын иһин, мэлдьи ситиһии кинини арыаллыыра. Холобура, кини «Уһуктуу» диэн балетын либреттота, «Хаҥалас Боотур» диэн олоҥхотун сценарийа Владивосток куоратыгар, үөрэнээччилэр күрэхтэһиилэригэр иккис миэстэни ылбыттара.
Павел Николаевич мэлдьи билиитин-көрүүтүн хаҥатан иһэрэ. Холобура, Сэбиэскэй Аармыйа кэккэтигэр үс сыл сулууспалаан баран, Намнааҕы педагогическай училищеҕа хачыгаардыы-хачыгаардыы, бу үөрэх кыһатын художественнай салаатын бэрт ситиһиилээхтик үөрэнэн бүтэрбитэ, онтон Покровскай орто оскуолатыгар уруһуй, черчение учууталынан икки сыл айымньылаахтык үлэлээбитэ.
Ол эрэн билиигэ-көрүүгэ мэлдьи тардыстыылаах эдэр киһи СГУ историческай-филологическай факультетын, саха тылын уонна литературатын салаатыгар киирэн үөрэммитэ. Ол умнуллубат устудьуоннуур кэмнэригэр араас литературнай түмсүүлэргэ, тэрээһиннэргэ актыыбынай кыттыыны ылара. Ордук сөбүлээн «Сэргэлээх уоттара», «Хомус» диэн литературнай түмсүүлэргэ сылдьан, айар талаанын сытыылыыра. Кини хоһоонноро, ыстатыйалара өрөспүүбүлүкэ хаһыаттарыгар, уус-уран сурунаалларыгар тиһигин быспакка бэчээттэнэллэрэ. Павел Харитонов университетын бүтэрэригэр, урут киэҥник ырытыллыбатах, талааннаах бэйиэт Таллан Бүрэ айар үлэтигэр анаан: «Поэт Таллан Бүрэ айар үлэтин уратылара» диэн тиэмэҕэ дипломнай үлэтин бэрт ситиһиилээхтик кемүскээбитэ. Онтон урукку үлэлээбит оскуолатыгар Покровскайга саха тылын уонна литературатын учууталынан үлэҕэ ылыллыбыта. 1980 сыллаахха Павел Николаевич бастакы поэтическай кинигэтэ «Хаар кыыс» диэн ааттанан бэчээккэ тахсыбыта. Кини бу сылларга утаппыттыы дьаныһан туран, бэйэтин саҥа суруйбут хоһооннорун, бэйиэмэлэрин өрөспүүбүлүкэ хаһыаттарыгар, сурунаалларыгар тиһигин быспакка бэчээттэтэрэ. Бэйиэт кириитикэ жанрыгар эмиэ таһаарыылаахтык үлэлээбитэ.